सांगली मनपाचा महिलांसाठी मोठा निर्णय ; ॲडव्हान्स ब्युटी पार्लरचे मोफत प्रशिक्षण ; स्वयंरोजगाराची संधी

LiVE NEWS | UPDATE

सांगली | महाराष्ट्र दणका न्युज नेटवर्क

प्रतिनिधी | श्रीकांत यमगर

सांगली-मिरज-कुपवाड महानगरपालिकेने (मनपा) शहरातील गरजू, होतकरू आणि आर्थिकदृष्ट्या दुर्बल महिलांसाठी मोठे पाऊल उचलत ॲडव्हान्स ब्युटी पार्लरचे मोफत प्रशिक्षण देण्याचा निर्णय जाहीर केला आहे. महिला व बाल विकास तसेच दिव्यांग कल्याण विभागाच्या माध्यमातून हा उपक्रम राबविण्यात येत असून कौशल्यवर्धनाच्या माध्यमातून महिलांना आर्थिकदृष्ट्या सक्षम करण्यावर भर देण्यात आला आहे.

या प्रशिक्षणात प्रगत दर्जाचे ब्युटी केअर, मेकअप आर्ट, सलून व्यवस्थापन, आधुनिक थेरपी पद्धती अशा अनेक उपयुक्त घटकांचा समावेश असणार आहे. या कोर्सद्वारे महिलांना घरबसल्या स्वतःचा व्यवसाय सुरू करण्याची संधी उपलब्ध होणार असून शहरातील अनेक महिलांसाठी हा उपक्रम रोजगारनिर्मितीचा नवा मार्ग ठरणार आहे.

महानगरपालिकेच्या वतीने सांगण्यात आले की, स्वयंरोजगारासाठी महिलांना सक्षम बनवणे हा या उपक्रमाचा प्रमुख उद्देश आहे. शहरातील दुर्बल घटकातील महिलांनी आर्थिक स्वावलंबनाचा मार्ग स्वीकारावा, कौशल्ये आत्मसात करून उद्योगाभिमुख व्हावे, यासाठी मनपाने हा उपक्रम राबविला आहे.

या प्रशिक्षणासाठीचे प्रवेश अर्ज मनपाच्या महिला व बाल विकास विभागात उपलब्ध असून अर्ज भरण्याची अंतिम मुदत ५ डिसेंबर पर्यंत आहे. आवश्यक कागदपत्रांसह पूर्ण अर्ज कार्यालयीन वेळेत सादर करणे आवश्यक आहे. मर्यादित जागांमुळे लवकर अर्ज करण्याचे आवाहनही करण्यात आले आहे.

महापालिकेने शहरातील सर्व इच्छुक महिला व युवतींना या मोफत प्रशिक्षणाचा लाभ घेऊन आत्मनिर्भरतेकडे पहिले पाऊल टाकण्याचे आवाहन केले आहे. महिलांच्या कौशल्यविकासाला नवे बळ देणारा हा उपक्रम शहरात उत्सुकता निर्माण करीत आहे.