टाटा कंपनीविरोधात आंदोलनाचा इशारा; ग्राहक फसवणुकीचा आरोप

LiVE NEWS | UPDATE

सांगली | महाराष्ट्र दणका न्युज नेटवर्क

विशेष प्रतिनिधी | जयंत मगरे

सांगली जिल्ह्यात टाटा कंपनीच्या इलेक्ट्रॉनिक वस्तूंविषयी ग्राहकांची फसवणूक होत असल्याचा आरोप पुढे आला आहे. या पार्श्वभूमीवर रिपब्लिकन पार्टी ऑफ इंडिया (आरपीआय) सांगली जिल्ह्याच्या वतीने जिल्हाधिकाऱ्यांना निवेदन देण्यात आले असून संबंधित डीलर व कंपनीवर कारवाई करण्याची मागणी करण्यात आली आहे.

निवेदनानुसार, एका ग्राहकाने अलीकडेच टाटा कंपनीचा फ्रिज खरेदी केला होता. मात्र, खरेदी केल्यानंतर काही दिवसांतच सदर फ्रिजमध्ये बिघाड निर्माण झाल्याची तक्रार करण्यात आली आहे. याबाबत संबंधित डीलर तसेच कंपनीच्या सेवा विभागाशी संपर्क साधूनही समाधानकारक प्रतिसाद मिळाला नसल्याचे नमूद करण्यात आले आहे. वारंवार पाठपुरावा करूनही तांत्रिक अडचण दूर न झाल्याने ग्राहक त्रस्त असल्याचे सांगण्यात आले.

आरपीआयच्या पदाधिकाऱ्यांनी जिल्हाधिकाऱ्यांना दिलेल्या निवेदनात ग्राहक संरक्षण कायद्यानुसार संबंधित कंपनी व विक्रेत्यावर योग्य ती कारवाई करावी, अशी मागणी केली आहे. ग्राहकांची आर्थिक व मानसिक फसवणूक थांबविण्यासाठी प्रशासनाने तातडीने हस्तक्षेप करावा, असेही नमूद करण्यात आले आहे.

दरम्यान, प्रशासनाने लवकरात लवकर दखल न घेतल्यास जिल्हाधिकारी कार्यालयासमोर उपोषण आंदोलन छेडण्याचा इशारा देण्यात आला आहे. ग्राहकांना न्याय मिळावा व अशा प्रकारच्या घटना पुन्हा घडू नयेत, यासाठी कडक भूमिका घेण्याची मागणी करण्यात आली आहे.