LiVE NEWS | UPDATE
सांगली | महाराष्ट्र दणका न्युज नेटवर्क
मिरज | मल्लेवाडी परिसरात शुक्रवारी (दि. १८ जुलै) रात्रीच्या सुमारास दोन दुचाकींची समोरासमोर धडक होऊन एक युवक जागीच ठार झाल्याची दुर्दैवी घटना घडली. या अपघातात संतोषवाडी येथील दिनकर रामकृष्ण जाधव (वय अंदाजे ३०) यांचा दुर्दैवी मृत्यू झाला आहे. या घटनेमुळे संतोषवाडी आणि मल्लेवाडी परिसरात शोककळा पसरली आहे.
घटनेबाबत अधिक माहिती अशी की, एम.एच. १० सी.डी. ०६९७ क्रमांकाच्या आय स्मार्ट स्प्लेंडर दुचाकीवर दिनकर जाधव हे प्रवास करत होते. दरम्यान, मल्लेवाडी येथील इंटरनॅशनल स्कूलपासून काही अंतरावर समोरून येणाऱ्या (एम.एच. ०९ ए.वाय. ४८९१) क्रमांकाच्या बजाज बॉक्सर दुचाकीची त्यांच्या वाहनाशी जोरदार धडक झाली.
धडक इतकी जबरदस्त होती की स्प्लेंडर दुचाकीवरील दिनकर जाधव हे काही अंतरावर फेकले गेले. अपघात घडताच परिसरातील नागरिकांनी घटनास्थळी धाव घेतली आणि मदतकार्य सुरू केले. दोन्ही दुचाकींवरील जखमींना तातडीने मिरजेतील शासकीय रुग्णालयात हलवण्यात आले. मात्र, तेथे दाखल होण्यापूर्वीच डॉक्टरांनी दिनकर जाधव यांना मृत घोषित केले.
दिनकर जाधव हे संतोषवाडी परिसरातील तरुण व सभ्य स्वभावाचे नागरिक म्हणून ओळखले जात होते. त्यांचा अचानक झालेल्या मृत्यूमुळे त्यांच्या कुटुंबीयांवर दुःखाचा डोंगर कोसळला आहे.
दरम्यान, या अपघाताची नोंद मिरज ग्रामीण पोलीस ठाण्यात करण्यात आली असून, अपघाताचे नेमके कारण शोधण्यासाठी तपास सुरू आहे. प्राथमिक माहितीवरून अंदाज व्यक्त केला जात आहे की अंधार व वेग यामुळे अपघात घडला असावा. पोलिसांनी दोन्ही वाहने ताब्यात घेतली असून पुढील कारवाई प्रक्रियेत आहे. या दुर्दैवी घटनेमुळे संतोषवाडी, मल्लेवाडी व आजूबाजूच्या परिसरात हळहळ व्यक्त होत आहे.
