LiVE NEWS | UPDATE
सांगली | महाराष्ट्र दणका न्युज नेटवर्क
प्रतिनिधी | श्रीकांत यमगर
मिरज | बुधगाव येथील शतकापेक्षा जुने उपडाकघर आता नव्या रुपात उभे ठाकले आहे. शनिवार, दि. १३ रोजी नव्याने बांधलेल्या आधुनिक इमारतीचा लोकार्पण सोहळा उत्साहात पार पडला. मुख्य पोस्ट मास्टर जनरल, महाराष्ट्र सर्कल अमिताभ सिंह यांच्या हस्ते या वास्तूचे लोकार्पण झाले. क्षेत्रीय निर्देशक रमेश पाटील, सरपंच वैशाली पाटील आदी मान्यवरांच्या उपस्थितीत हा सोहळा पार पडला. अध्यक्षस्थानी प्रवर अधीक्षक डाकघर बसवराज वालीकार होते.
शंभराहून अधिक वर्षांची परंपरा
बुधगाव उपडाकघराचे कामकाज सन १९०८ पासून जुन्या इमारतीत सुरू होते. काळाच्या ओघात इमारत अरुंद व जीर्ण झाल्याने नवीन इमारतीची गरज तीव्रतेने भासत होती. २०२३ मध्ये सांगलीत प्रवर अधीक्षक म्हणून कार्यरत असताना रमेश पाटील यांनी या इमारतीचा प्रस्ताव पुढे नेला. सरपंच वैशाली पाटील यांनी स्थानिक पातळीवर प्रयत्न करून याला गती दिली. नंतर गोवा येथे क्षेत्रीय निर्देशक म्हणून रुजू झाल्यानंतर पाटील यांनी याचा सातत्याने पाठपुरावा केला. अखेर मुख्य पोस्ट मास्टर जनरल अमिताभ सिंह यांनी प्रस्तावास मंजुरी देत प्रकल्प प्रत्यक्षात उतरवला.
कार्यक्रमाची उजळणी
कार्यक्रमाच्या सुरुवातीला अधीक्षक बसवराज वालीकार यांनी डाकघराचा शतकीय इतिहास उलगडला. जुन्या वास्तूतील कार्यप्रणाली, नागरिकांना झालेली गैरसोय व नव्या इमारतीमुळे होणारे फायदे त्यांनी उपस्थितांना सांगितले. यानंतर मान्यवरांनी आपले मनोगत व्यक्त केले.
मुख्य पोस्ट मास्टर जनरल अमिताभ सिंह यांनी भारतीय डाक सेवेचे महत्त्व अधोरेखित करताना ‘डाक सेवा जन सेवा’ या नव्या ब्रीदवाक्याचा उच्चार केला. ग्रामीण भागातील प्रत्येक नागरिकापर्यंत डाक विभागाची सेवा पोहोचावी, यासाठी विभाग कटिबद्ध असल्याचे ते म्हणाले.
रमेश पाटील यांनी आपल्या मनोगतात सांगितले की, बुधगाव उपडाकघराची ही भव्य वास्तू गावाचा अभिमान आहे. प्रत्येक घरात पोस्ट ऑफिस खाते उघडण्यासाठी ग्रामपंचायतीने पुढाकार घ्यावा, असे आवाहन त्यांनी ग्रामस्थांना केले.
सरपंच वैशाली पाटील यांनी ग्रामपंचायतीच्या वतीने सहकार्याचे आश्वासन देत गावकऱ्यांना आधुनिक सेवांचा लाभ घ्यावा, असे सांगितले.
गावकऱ्यांचा सहभाग
या लोकार्पण सोहळ्याला ग्रामस्थ, विविध संस्थांचे पदाधिकारी मोठ्या संख्येने उपस्थित होते. उपस्थितांच्या चेहऱ्यावर नवीन इमारतीबद्दल अभिमान स्पष्ट दिसत होता.
नव्या इमारतीतील सुविधा
नवीन इमारतीत प्रशस्त जागा, आधुनिक कामकाज पद्धती, संगणकीकृत प्रणाली, तसेच लोकाभिमुख सुविधा उपलब्ध आहेत. त्यामुळे गावकऱ्यांना व्यवहार, बँकिंग सेवा, विमा योजना आणि डाक वितरण यात अधिक सुलभता मिळणार आहे.
गावाच्या प्रगतीचा टप्पा
बुधगाव उपडाकघर हे गावाच्या सामाजिक आणि आर्थिक जीवनाचा अविभाज्य भाग आहे. आता नव्या वास्तूमुळे ही सेवा अधिक सक्षम, कार्यक्षम आणि नागरिकाभिमुख झाली आहे. गावकऱ्यांच्या दैनंदिन जीवनात यामुळे सकारात्मक बदल घडेल, अशी अपेक्षा व्यक्त होत आहे.