सोलापूर पूरग्रस्तांसाठी मिरज मतदारसंघातून मदतीचा हात ; भाजप कार्यकर्त्यांचा समाजाभिमुख पुढाकार

LiVE NEWS | UPDATE

सांगली | महाराष्ट्र दणका न्युज नेटवर्क

विशेष प्रतिनिधी | जयंत मगरे

मिरज | सोलापूर जिल्ह्यात झालेल्या अतिवृष्टी आणि ढगफुटीसदृश पावसामुळे अनेक भागांमध्ये भीषण पूरस्थिती निर्माण झाली आहे. हजारो कुटुंबांचे जनजीवन विस्कळीत झाले असून शेतजमिनी, घरे, जनावरं आणि रोजीरोटीचे साधन वाहून गेले आहे. या अनपेक्षित संकटामुळे पूरग्रस्त बांधवांवर मोठे संकट कोसळले आहे.

या कठीण परिस्थितीत मिरज विधानसभा मतदारसंघातील भारतीय जनता पार्टीच्या कार्यकर्त्यांनी मदतीसाठी पुढाकार घेतला आहे. आमदारांच्या आवाहनाला प्रतिसाद देत कार्यकर्त्यांनी उत्स्फूर्तपणे जीवनावश्यक वस्तू संकलित करून पूरग्रस्त भागात पोहोचवल्या. यात तांदूळ, गहू, आटा, साखर, साबणाच्या वड्या तसेच जनावरांसाठी वैरण (चारा) यांचा समावेश आहे. या मदतीमुळे पूरग्रस्त कुटुंबांना तातडीचा दिलासा मिळणार आहे.

मिरज मतदारसंघातील कार्यकर्त्यांची समाजाभिमुख वृत्ती आणि तत्परता कौतुकास्पद मानली जात आहे. कठीण काळात दाखवलेली ही सामाजिक एकजूट आणि परस्परांची साथ ही खरी प्रेरणादायी ठरते. दानशूर नागरिक, कार्यकर्ते आणि सहकार्य करणाऱ्या सर्वांच्या योगदानामुळे पूरग्रस्त बांधवांना दिलासा मिळत असून त्यांचा आत्मविश्वास वाढत आहे.

संकटाच्या प्रसंगी एकत्र येऊन समाजासाठी काम करणे हीच खरी मानवता आहे, याची जाणीव या कार्यातून झाली आहे. अशा संवेदनशील उपक्रमामुळे सामाजिक बांधिलकी अधिक दृढ होऊन लोकांमध्ये परस्पर सहाय्याची भावना अधिक वाढत आहे. सोलापूरच्या पूरग्रस्तांना मिळालेला हा मदतीचा हात नक्कीच नवा आशावाद निर्माण करणारा आहे.