मिरज : मिरज येथील सिव्हिल हॉस्पिटलच्या प्रवेशद्वाराच्या कामादरम्यान मोठी दुर्घटना घडल्याची माहिती समोर आली आहे. हॉस्पिटलच्या बाहेरील प्रवेशद्वाराचे बांधकाम सुरू असताना अचानक स्लॅब कोसळल्याने परिसरात एकच खळबळ उडाली.
स्लॅब कोसळताच त्याखाली काही कामगार आणि नागरिक अडकल्याची प्राथमिक माहिती मिळत आहे. या दुर्घटनेत एकूण 7 जण जखमी झाल्याची माहिती समोर आली आहे. घटनेनंतर तातडीने बचावकार्य सुरू करण्यात आले असून, ढिगाऱ्याखाली अडकलेल्या व्यक्तींना बाहेर काढण्यासाठी प्रयत्न करण्यात आले.
दुर्घटनेची माहिती मिळताच संबंधित प्रशासन आणि बचाव पथकांनी घटनास्थळी धाव घेतली. जखमींना तातडीने उपचारासाठी रुग्णालयात दाखल करण्यात आले असून, त्यांच्यावर उपचार सुरू आहेत.
दरम्यान, प्रवेशद्वाराचे बांधकाम सुरू असताना स्लॅब नेमका कोणत्या कारणामुळे कोसळला, याबाबत अद्याप अधिकृत माहिती समोर आलेली नाही. बांधकामाची गुणवत्ता, सुरक्षेच्या उपाययोजना आणि कामाच्या ठिकाणी आवश्यक खबरदारी घेण्यात आली होती का, याबाबत तपासानंतरच अधिक माहिती स्पष्ट होणार आहे.
या घटनेमुळे रुग्णालय परिसरात काही काळ गोंधळाचे वातावरण निर्माण झाले होते. प्रशासनाकडून परिस्थिती नियंत्रणात आणण्याचे काम सुरू आहे.
या दुर्घटनेतील जखमींची प्रकृती आणि घटनेबाबतची अधिकृत माहिती प्रशासनाकडून मिळाल्यानंतर पुढील अपडेट समोर येणार आहे.