घरफोडी करणाऱ्या युवकास अटक ; १० लाखाचा मुद्देमाल जप्त

LiVE NEWS | UPDATE

सांगली | महाराष्ट्र दणका न्युज नेटवर्क

विशेष प्रतिनिधी | जयंत मगरे
सांगली शहरातील जामवाडी येथील घर फोडून दागिने लंपास करणाऱ्या तरुणाला अटक करण्यात आली आहे. त्याच्याकडून चोरलेले 10 लाखाचे दागिने जप्त करण्यात आले आहेत. योगेश अनिल जाधव (वय ३६. रा.कबाडे हॉस्पिटलजवळ, कोल्हापूर रोड, सांगली) असे अटक केलेल्याचे नाव आहे.

अधिक माहिती अशी कि, १ ते १५ नोव्हेंबर दरम्यान जामवाडी येथील अनिरुद्ध सूर्यवंशी यांचे घर फोडून दागिने लंपास करण्यात आले होते. यातील संशयितांना पकडण्याच्या सूचना शहरचे वरिष्ठ पोलीस निरीक्षक संजय मोरे यांनी गुन्हे प्रकटीकरण शाखेला दिले होते. पथक चोरटयांचा शोध घेत होते. पथकातील संतोष गळवे, गौतम कांबळे यांना एकजण चोरीचे दागिने विक्री करण्यासाठी आकाशवाणी केंद्रामागे येणार असल्याची माहिती खबऱ्याद्वारे मिळाली. पथकाने तेथे सापळा रचून जाधव याला ताब्यात घेतले. त्याची तपासणी केल्यावर त्याच्या पँटच्या खिशात सोन्याच्या बांगडया सापडल्या.

त्याबाबत कसून चौकशी केली असता, त्याने जामवाडी येथील एका घरातून त्या चोरल्याची कबुली दिली. त्याला अटक करून त्याच्याकडून 100 ग्रॅम वजनाचा सोन्याचा गोफ, 85 ग्रॅम वजनाच्या 6 सोन्याच्या बांगडया, 15 ग्रॅमची चेन असा 10 लाखांचा मुद्देमाल जप्त करण्यात आला आहे.

सांगली शहरचे वरिष्ठ पोलीस निरीक्षक संजय मोरे यांच्या मार्गदर्शनाखाली उपनिरीक्षक महादेव पोवार, संदीप पाटील, संतोष गळवे, गौतम कांबळे, योगेश सटाले, गणेश कोळेकर, संदीप कुंभार, संदीप कोळी, दिग्विजय साळुंखे, कॅप्टन गुंडवाडे आदींच्या पथकाने ही कारवाई केली.