शिंदेवाडी येथे उसाच्या ट्रॅक्टर-एसटी बसची भीषण धडक ; अनेक जखमी, चालक थोडक्यात बचावले

LiVE NEWS | UPDATE

सांगली | महाराष्ट्र दणका न्युज नेटवर्क

मिरज पूर्व भागातील शिंदेवाडी येथे बुधवारी सकाळी झालेल्या भीषण अपघाताने परिसर हादरला. उसाने भरलेल्या ट्रॅक्टरने मिरज एसटी डेपोच्या बसला जोरदार धडक दिल्याने अनेक प्रवासी जखमी झाले असून, एसटी बसचालकाचा पाय मोडल्याची माहिती मिळते. सुदैवाने मोठ्या जीवितहानीपासून थोडक्यात बचाव झाला.

मिरजकडून शिंदेवाडीमार्गे मदभावीकडे जाणारी एसटी बस ओढ्याजवळ पोहोचताच शिंदेवाडीकडून आरगकडे जाणारा ऊस भरलेला ट्रॅक्टर अचानक वेगाने ओढ्यात उतरला. यावेळी बस व ट्रॅक्टरची समोरासमोर जोरदार धडक होऊन ट्रॉली पलटी झाली, तर बस थेट ओढ्यात घसरून थांबली. धडकेचा जोर एवढा होता की बसचालकाच्या बाजूला मोठे नुकसान होऊन त्याचा पाय मोडला. त्याचबरोबर महिला, प्रवासी आणि विद्यार्थी असे अनेक जण किरकोळ ते मध्यम जखमी झाले.

बसमध्ये शिंदेवाडी, लिंगनूर, खटाव व मदभावी परिसरातील ३० ते ३५ प्रवासी होते. त्यापैकी खटाव येथील एका जाधव कुटुंबातील मुलगी धडकेनंतर बेशुद्ध पडल्याची माहिती स्थानिकांनी दिली. अपघातानंतर ट्रॅक्टर चालक पळून गेला असून त्याचा शोध सुरू आहे.

दरम्यान, ट्रॅक्टर चालकाने मोठ्या आवाजात टेप व साऊंड सिस्टम लावून वाहन चालवत असल्याची चर्चा घटनास्थळी रंगली. मिरज पूर्व भागात ऊस वाहतूक करणारे अनेक ट्रॅक्टर चालक अशाच पद्धतीने साऊंड लावून वेगात वाहने चालवतात. त्यामुळे पोलिसांनी अशा वाहनचालकांवर कठोर कारवाई करून गुन्हे दाखल करणे गरजेचे असल्याची जोरदार मागणी नागरिकांतून सुरू आहे.