LiVE NEWS | UPDATE
मुंबई | महाराष्ट्र दणका न्युज नेटवर्क
उद्धव-राज एकाच मंचावर ; ज्ञानेश कुमार यांच्या राजीनाम्याच्या मागणीसह ‘गर्जना’ मोर्चात कार्यकर्त्यांचा प्रचंड सहभाग
मुंबई | केंद्रीय निवडणूक आयोगाचे मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसह विविध मुद्द्यांवरून मुंबईत आज उद्धव ठाकरे आणि राज ठाकरे यांच्या नेतृत्वाखाली ‘गर्जना’ मोर्चा काढण्यात आला. मेट्रो सिनेमा परिसरातून सुरू झालेल्या या मोर्चाने मुंबईच्या राजकीय वातावरणात चांगलीच खळबळ उडवली. ठाकरे बंधूंच्या एकत्रित नेतृत्वाखाली निघालेल्या या मोर्चात नागरिक आणि कार्यकर्त्यांची मोठी गर्दी पाहायला मिळाली.
मोर्चाच्या मार्गावर जिकडे नजर टाकावी तिकडे आंदोलकांची गर्दी, हातात फडकणारे पक्षांचे झेंडे आणि घोषणांचा गजर असे चित्र होते. उद्धव ठाकरे आणि राज ठाकरे एकत्र आल्याने कार्यकर्त्यांमध्ये विशेष उत्साह दिसून आला. ठाकरे बंधूंच्या समर्थनार्थ देण्यात येणाऱ्या घोषणांनी परिसर दणाणून गेला.
निवडणूक प्रक्रियेतील विविध मुद्द्यांवरून सुरू असलेल्या नाराजीला या मोर्चाच्या माध्यमातून राजकीय व्यासपीठ मिळाले. मुख्य निवडणूक आयुक्त ज्ञानेश कुमार यांच्या राजीनाम्याची मागणी हा आंदोलनातील प्रमुख मुद्दा ठरला. निवडणूक व्यवस्थेबाबत उपस्थित करण्यात आलेल्या प्रश्नांवर सरकार आणि निवडणूक आयोगाने भूमिका स्पष्ट करावी, असा आंदोलकांचा सूर होता.
या मोर्चाला महाविकास आघाडीतील विविध नेत्यांनीही उपस्थिती लावली. काँग्रेसचे ज्येष्ठ नेते बाळासाहेब थोरात यांच्यासह राष्ट्रवादी काँग्रेस आणि इतर घटक पक्षांचे नेते सहभागी झाले. त्यामुळे हे आंदोलन केवळ ठाकरे बंधूंपुरते मर्यादित न राहता व्यापक विरोधी राजकीय एकजुटीचे चित्र निर्माण करणारे ठरले.
मोर्चादरम्यान कार्यकर्त्यांचा उत्साह, घोषणाबाजी आणि ठाकरे बंधूंच्या समर्थनार्थ व्यक्त होणारा आवाज यामुळे मुंबईतील राजकीय वातावरण तापले. उद्धव आणि राज ठाकरे यांचे एकत्र येणे हा या आंदोलनातील सर्वाधिक चर्चेचा विषय ठरला.
एकीकडे निवडणूक आयोगाच्या भूमिकेवरून आक्रमक भूमिका, तर दुसरीकडे ठाकरे बंधूंची एकजूट या दोन्ही घडामोडींमुळे ‘गर्जना’ मोर्चाने राज्याच्या राजकारणात लक्ष वेधून घेतले आहे. या आंदोलनाचा पुढील राजकीय परिणाम काय होणार, याकडे आता सर्वांचे लक्ष लागले आहे.
About the Author
