शैक्षणिक वर्ष २०२६-२७ साठी विद्यार्थ्यांना दिलासा; पात्र विद्यार्थ्यांनी मुदतीत अर्ज सादर करण्याचे आवाहन
LiVE NEWS | UPDATE
वाशिम | महाराष्ट्र दणका न्युज नेटवर्क
शैक्षणिक वर्ष २०२६-२७ साठी शासकीय वसतिगृह, ज्ञानज्योती सावित्रीबाई फुले आधार योजना आणि पंडित दीनदयाळ उपाध्याय स्वयंम योजनेच्या प्रवेश प्रक्रियेला ३० ऑक्टोबर २०२६ पर्यंत मुदतवाढ देण्यात आली आहे.
तांत्रिक अडचणींमुळे ऑफलाइन अर्जाची सुविधा
ऑनलाइन पोर्टलवर आधार प्रमाणीकरण पूर्ण न होणे, अर्जाची प्रक्रिया पुढे न जाणे तसेच तांत्रिक अडचणी येत असल्यामुळे विद्यार्थ्यांना ऑफलाइन पद्धतीने प्रवेशासाठी अर्ज सादर करण्याची सुविधा उपलब्ध करून देण्यात आली आहे.
इतर मागास प्रवर्गातील विद्यार्थ्यांसाठी प्रवेश प्रक्रिया
इतर मागास वर्ग, विमुक्त जाती व भटक्या जमाती तसेच विशेष मागास प्रवर्गातील शासकीय वसतिगृह आणि संबंधित योजनांच्या लाभापासून वंचित असलेल्या विद्यार्थ्यांसाठी ही प्रवेश प्रक्रिया राबविण्यात येत आहे. यापूर्वी ऑफलाइन प्रवेश अर्ज सादर करण्यासाठी १० ऑक्टोबर २०२६ पर्यंत मुदत देण्यात आली होती. आता विद्यार्थ्यांची गैरसोय टाळण्यासाठी ही मुदत ३० ऑक्टोबरपर्यंत वाढविण्यात आली आहे.
तालुका व जिल्हास्तरावरील विद्यार्थ्यांसाठी मार्गदर्शन
वाशिम जिल्ह्यात तालुक्याच्या ठिकाणी असलेल्या महाविद्यालयांमध्ये शैक्षणिक वर्ष २०२६-२७ मध्ये व्यावसायिक व बिगरव्यावसायिक अभ्यासक्रमांना प्रवेश घेतलेल्या विद्यार्थ्यांनी ज्ञानज्योती सावित्रीबाई फुले आधार योजना आणि पंडित दीनदयाळ उपाध्याय स्वयंम योजनेसाठी अर्ज सादर करावेत. जिल्ह्याच्या ठिकाणी शासकीय वसतिगृह उपलब्ध असल्याने जिल्हास्तरावरील विद्यार्थ्यांनी वसतिगृह प्रवेशासाठी अर्ज करावेत.
वसतिगृह प्रवेश न मिळालेल्या विद्यार्थ्यांनाही संधी
शासकीय वसतिगृहासाठी पात्र असूनही गुणवत्तेनुसार किंवा वसतिगृहाच्या क्षमतेअभावी प्रवेश न मिळालेल्या विद्यार्थ्यांचे अर्जही ज्ञानज्योती सावित्रीबाई फुले आधार योजना आणि पंडित दीनदयाळ उपाध्याय स्वयंम योजनेसाठी विचारात घेतले जाणार आहेत.
महत्त्वाचे आवाहन
तरी संबंधित पात्र विद्यार्थ्यांनी मुदतीत ऑफलाइन पद्धतीने अर्ज सादर करावेत, असे आवाहन इतर मागास बहुजन कल्याण विभाग, वाशिम यांच्या वतीने करण्यात आले आहे.