मिरज | शासकीय वैद्यकीय महाविद्यालय व रुग्णालयासमोरील स्वागत कमान कोसळून कामगार गंभीर जखमी झाल्याच्या घटनेप्रकरणी रिपब्लिकन पार्टी ऑफ इंडिया (आठवले गट) आक्रमक झाली आहे. या दुर्घटनेला जबाबदार असलेल्या ठेकेदारावर कठोर कारवाई करावी, ठेकेदार खराडे यांचा परवाना रद्द करून त्यांना काळ्या यादीत टाकावे, तसेच सार्वजनिक बांधकाम विभागाच्या (PWD) संबंधित अधिकारी आणि अभियंत्यांची जबाबदारी निश्चित करून त्यांच्यावरही कायदेशीर कारवाई करावी, या मागण्यांसाठी मिरज येथील प्रांताधिकारी कार्यालयासमोर सुरू करण्यात आलेले बेमुदत धरणे आंदोलन दुसऱ्या दिवशीही सुरूच आहे. स्वागत कमान कोसळून कामगार जखमी झाल्याच्या घटनेमुळे बांधकामाच्या गुणवत्तेचा आणि सुरक्षिततेचा प्रश्न ऐरणीवर आला आहे. या दुर्घटनेची सखोल चौकशी करून दोषींवर कठोर कारवाई होईपर्यंत आंदोलन मागे घेणार नसल्याचा निर्धार RPIच्या पदाधिकारी व कार्यकर्त्यांनी व्यक्त केला आहे.
अज्ञातांविरोधातील गुन्ह्याने प्रश्न सुटणार का?
या दुर्घटनेप्रकरणी गांधी चौकी पोलीस ठाण्यात अज्ञात व्यक्तींविरुद्ध गुन्हा दाखल करण्यात आला आहे. मात्र, स्वागत कमानीचे बांधकाम कोणी केले, कामाचा दर्जा तपासण्याची जबाबदारी कोणाची होती आणि बांधकाम सुरू असताना आवश्यक ती देखरेख करण्यात आली होती का, असे अनेक प्रश्न उपस्थित होत आहेत.
केवळ अज्ञात व्यक्तींविरुद्ध गुन्हा दाखल करून प्रकरणाची जबाबदारी संपत नाही. बांधकाम करणारा ठेकेदार, कामावर देखरेख ठेवणारे अधिकारी आणि अभियंते यांचीही भूमिका तपासली पाहिजे. दुर्घटनेमागील नेमकी कारणे शोधून संबंधितांची जबाबदारी निश्चित करावी, अशी मागणी आंदोलनकर्त्यांनी केली आहे.
ठेकेदाराचा परवाना रद्द करा; काळ्या यादीत टाका
स्वागत कमानीच्या बांधकामात निर्धारित गुणवत्तेचे निकष पाळण्यात आले होते का, बांधकामासाठी आवश्यक तांत्रिक नियमांचे पालन झाले होते का आणि सुरक्षिततेच्या उपाययोजनांकडे दुर्लक्ष करण्यात आले होते का, याची निष्पक्ष चौकशी करण्याची मागणी RPIने केली आहे. सदर चौकशीत ठेकेदार खराडे दोषी आढळल्यास त्यांचा परवाना रद्द करून त्यांना काळ्या यादीत टाकावे. तसेच सार्वजनिक बांधकाम विभागाच्या संबंधित अधिकारी आणि अभियंत्यांची भूमिका तपासून, दोष व पुरावे आढळल्यास त्यांच्यावरही कायद्यानुसार कारवाई करावी. आवश्यक पुरावे उपलब्ध असल्यास त्यांना प्रकरणात सहआरोपी करण्याची मागणीही आंदोलनकर्त्यांनी केली आहे.
कामगारांच्या सुरक्षेशी तडजोड खपवून घेणार नाही
शासकीय बांधकामांमध्ये दर्जा आणि सुरक्षिततेला सर्वोच्च प्राधान्य दिले गेले पाहिजे. स्वागत कमान कोसळून कामगार जखमी होण्याची घटना ही गंभीर असून, संभाव्य निष्काळजीपणासह बांधकामाचा दर्जा आणि देखरेखीतील त्रुटींची चौकशी होणे आवश्यक आहे. अशा घटनांची पुनरावृत्ती टाळण्यासाठी दोषींवर कठोर कारवाई करावी, अशी भूमिका RPIने मांडली आहे.
मागण्यांवर ठोस कार्यवाही होऊन दोषींवर कारवाई झाल्याशिवाय बेमुदत धरणे आंदोलन मागे घेणार नसल्याचे पक्षाच्या वतीने स्पष्ट करण्यात आले आहे.
या आंदोलनात शहर जिल्हाध्यक्ष पोपट (नाना) कांबळे, तालुकाध्यक्ष अरविंद (बापू) कांबळे, युवक जिल्हा कार्याध्यक्ष स्वप्नील खांडेकर, युवक मिरज शहराध्यक्ष अमित वाघमारे यांच्यासह पक्षाच्या विविध आघाड्यांचे पदाधिकारी आणि कार्यकर्ते सहभागी झाले आहेत.
स्वागत कमान दुर्घटनेची निष्पक्ष चौकशी करून जबाबदारी निश्चित होणार का आणि RPIच्या मागण्यांवर प्रशासन काय भूमिका घेणार, याकडे आता सर्वांचे लक्ष लागले आहे.